Bakı Vaşinqtonu Ermənistanın öhdəliklərini yerinə yetirmək üçün İrəvana təsir göstərməyə çağırır


Azərbaycan Xarici İşlər Nazirliyinin (XİN) sözçüsü Ayxan Hacızadə hesab edir ki, Vaşinqton Ermənistanı öz öhdəliklərini yerinə yetirməyə və Azərbaycanın Qarabağ iqtisadi rayonunda qanunsuz fəaliyyətini dayandırmağa çağırmalıdır.

Xatırladaq ki, çərşənbə axşamı keçirilən brifinqdə ABŞ Dövlət Departamentinin spikeri Ned Prays ABŞ-ın Laçın-Xankəndi yolu (Laçın yolu) ətrafındakı vəziyyətdən narahatlığını bildirərək, həmin yol ilə ticarət və fərdi səfərlər də daxil olmaqla, sərbəst hərəkətin tam bərpasına çağırıb.

"Azərbaycanın Qarabağ bölgəsinə yük çatdıran 1 mindən çox nəqliyyat vasitəsi sizin (Prays - İF) yanvarın 24-də dediklərinizin əksini sübut edir. Ermənistan tərəfini öhdəliklərini yerinə yetirməsi (üçtərəfli razılaşmalar çərçivəsində - İF) və qanunsuz fəaliyyəti dayandırmasına çağırmaq məqsədəuyğun olardı!", - Hacızadə bu gün Twitter hesabında brifinqdə Praysın açıqlamalarına cavab olaraq yazıb.

2022-ci il dekabrın 12-dən etibarən Azərbaycanın ekofəalları və QHT nümayəndələri Qarabağ iqtisadi rayonunda Şuşa-Xankəndi avtomobil yolunda regionda faydalı qazıntı yataqlarının, xüsusilə, Qızılbulaq qızıl və Dəmirli mis-molibden yataqlarının qanunsuz istismarına qarşı etiraz aksiyası keçirirlər.