Borrel: Aİ Azərbaycana qarşı sanksiyaların tətbiqini nəzərdən keçirmir

Avropa İttifaqı (Aİ) dekabrın 12-dən ekoloji aksiyanın keçirildiyi Laçın-Xankəndi yolunda (Laçın yolu) vəziyyətlə əlaqədar Azərbaycan barəsində sanksiyaların tətbqini nəzərdən keçirmir. Bu barədə Avropa İttfaqı diplomatiyasının rəhbəri Jozap Borrel bəyan edib.

“«Sanksiyalar yalnız Aİ-nin Ümumi Xarici Siyasət və Təhlükəsizlik Siyasəti məqsədlərinin irəli sürülməsi üçün vasitələrdən biridir və bu vəziyyətdə onların tətbiqi məsələsinə (Azərbaycan barəsində - BT) baxılmır», - Borrel Avropa deputatı Assita Kankonun Azərbaycana qarşı məhdudlaşdırıcı tədbirlərin tətbiqi imkanı barədə sualına cavab verərkək bildirib.

Borrel qeyd edib ki, Brüsseldə Laçın yolu ətrafında vəziyyəti müşahidə edirlər.

O vurğulayıb ki, Azərbaycan və Ermənistanın xarici işlər nazirləri Ceyhun Bayramov və Ararat Mirzoyanla daimi təmasdadır, Avropa İttifaqının (Aİ) Cənubi Qafqaz və Gürcüstan böhranı üzrə xüsusi nümayəndəsi Toivo Klaarisə Bakı və İrəvanla sıx əlaqədədir.

«AI-nin səyləri hər iki ölkənin (Azərbaycan və Ermənistan - İF) liderlərinin sadiqliklərini ifadə etdikləri dialoq vasitəsilə həll yollarının axtarışına yönəlib», - Borrel bildirib.

Xəbər verildiyi kimi, 2022-ci il dekabrın 12-dən etibarən Azərbaycanın ekofəalları və QHT nümayəndələri Qarabağ iqtisadi rayonunda Şuşa-Xankəndi avtomobil yolunda regionda faydalı qazıntı yataqlarının, xüsusilə, Qızılbulaq qızıl və Dəmirli mis-molibden yataqlarının qanunsuz istismarına qarşı etiraz aksiyası keçirirlər.