Türkiyənin turizm gəlirləri 53 %, xərcləri isə 2 dəfədən çox artıb

2022-ci ildə Türkiyə turizmdən 46 284,9 milyon ABŞ dolları gəlir əldə edib ki, bu da 2021-ci illə müqayisədə 53,4 % çoxdur.

Xarici mətbuatın Türkiyənin statistika qurumuna istinadən yaydığı xəbərə görə, illik gəlirin 34 477 milyon ABŞ dolları şəxsi xərcləmələrdən, 11 807,9 milyon ABŞ dolları isə tur-paketlərdən əldə olunub.

Bundan başqa, ötən il Türkiyə turizmə 4 276,5 milyon ABŞ dolları xərc çəkib ki, bu da əvvəlki ilə nisbətən 2,3 dəfə çoxdur. İllik xərcin 3 753,4 milyon ABŞ dollarını şəxsi xərcləmələr, 523,1 milyon ABŞ dollarını isə tur-paketlərin alınmasına çəkilən xərclər təşkil edib.