Göyərtəsində Azərbaycanın
İrandakı səfirliyinin təxliyə edilmiş əməkdaşlarının və onların ailə üzvlərinin
olduqları təyyarə bazar günü axşam saatlarında Heydər Əliyev Beynəlxalq
Aeroportuna enib.
Azərbaycan mətbuatl məlumat
verir ki, səfirliyin əməkdaşları “Azərbaycan Hava Yolları” QSC-nin xüsusi reysi
ilə təxliyə olunub.
Həmçinin, Azərbaycanın
Tehrandakı səfirliyinə xain terror hücumunun qarşısının alınması zamanı şəhid
olan mühafizə xidmətinin rəisi Orxan Əsgərovun nəşi Bakıya gətirilib. Bundan
başqa, səfirliyin yaralı mühafizəçisi də Bakıya çatdırılıb.
Azərbaycanın xarici işlər
nazirinin müavini Xələf Xələfov səfirliyə silahlı hücumu jurnalistlərə şərh edərək
bildirib: “Vyana Konvensiyasının müvafiq maddələrinə görə, səfirliyi qəbul edən
ölkə təhlükəsizliyə məsuliyyət daşıyır. Baş vermiş terror hadisəsi və onun ağır
nəticələri ilə əlaqədar İran bir dövlət kimi məsuliyyət daşıyır”.
Həmçinin o əlavə edib ki,
Azərbaycanın Tehrandakı səfirliyi diplomatik fəaliyyətini tam dayandırıb. O
cümlədən, Xələfov vurğulayıb ki, Azərbaycanın Təbrizdəki baş konsulluğu fəaliyyətini
davam etdirəcək.
Xələfov əlavə edib ki,
Bakı dəfələrlə İran tərəfinin nəzərinə çatdırıb ki, Azərbaycan Respublikasının
diplomatik nümayəndəliklərinə qarşı İran ərazisində təhdidlər var. Buna görə də
təhlükəsizlik tədbirlərinin artırılması tələb edilib. “Baş verən hadisə göstərdi
ki, İran bu tələblərimizə məsuliyyətsiz yanaşıb. İran tərəfindən terror aktının
şəffaf şəkildə araşdırılması, cinayətkarların məsuliyyətə cəlb olunmasını gözləyirik”,
- o qeyd edib.
Nazir müavini vurğulayıb
ki, Bakı səfirliyə hücum edən şəxsin bunu ailə problemləri ilə əlaqədar həyata
keçirməsi ilə bağlı Tehranın versiyası ilə razı deyil.
Həmçinin, Xələfov
vurğulayıb ki, bu terror aktı Bakı və Tehranın münasibətlərinə böyük zərbə vurub.